晴报：中年好声音2丨古淖文认半红不黑浮沉15年欠运
学习谦卑求进：当年赢冠军一定嚣
36岁的古淖文事隔15年再次参与歌唱比赛，今次在《中年好声音2》中，观众见证著他由评判口中负评如潮的参赛者，到慢慢成为大家喜欢的“巨星”，一步一脚印以不断改进来为自己说话。浮沉娱乐圈十多年，古淖文从没想过放弃，喜欢唱歌这份的单纯成为他坚持下去的动力。
古淖文自从15年前参加《亚洲星光大道》而为人所认识，当年的他得到第五名，然后就没有太多的然后，出过两张专辑，但留给大家的印象反而是他主持不同的澳门大型活动。今次《中年好声音2》虽然是大家熟悉的面孔，不过起初仍然因“江湖味”而备受负评，慢慢一步一步走到决赛，最终票选人气三甲，更赢得冠军。
他说：“今届《中年好声音2》位位都好有实力，能够得到冠军，我真係出尽九牛二虎之力，同参赛者之间係良性竞争，互相畀意见，甚至帮大家拣歌，呢个感觉同精神好好。（成日被嘲肥妈契仔得高分？）我都唔係好高分喎，点高得过安雅希？正常一定会被人提及，我同肥妈好多年合作，由《星光》开始就带我登台，冇需要隐瞒，打关键字一定搵到，与其特登去隐藏或删Po咪仲衰，做人要饮水思源，肥妈帮我好多。所以，我喺比赛好努力就係想话畀大家知，我係有实力嘅。”
古淖文深明比赛初期被指“骚Quali”，评判们都不太喜欢他的演绎，直至演绎《盼望的缘份》一曲，经导师谷娅溦的调较，慢慢令观众改观，感受到他的真挚。“我起初好怕再唱陈百强，因为《摘星》濑晒嘢，但经谷娅溦调较之后，居然大家好接受，估唔到古淖文呢个江湖友变得好真诚，当晚睇到好多网友都话感动到喊，就係呢一场令大家睇到不一样的古淖文，慢慢累积支持者直到决赛。”
古淖文笑认后生时年少气盛，感觉自己混血儿的靓仔外表就入行闯天下，最终入行15年在娱乐圈浮浮沉沉，会否曾经灰心过？他说：“有失望，因为觉得自己都算几努力，点解冇乜人提、冇乜人睇呢？我惟有同自己讲，冇人睇唔紧要，将来会有，哪怕只得一个观众拍手，我都会努力演出。咁多年来我冇谂过走，死就死啦继续行，因为我只係得一个技能，就係识唱歌，间中做主持，你叫我打写字楼工、政府工嗰啲真係搞唔掂，做老闆又冇钱唔够资格。庆幸咁多年虽然半红不黑，但做到自己最锺意嘅事已经好幸运。”
古淖文得奖后回家，给予妈妈一个拥抱，他笑言虽然是外国人血统，但没有太肉麻的情节，他感激父母一直以来全力支持他追梦，“爸爸做警察，妈妈係公务员，属于小康之家，可能得我一个独仔，妈妈见我去娱乐圈意已决，就畀我闯到而家。虽然搵钱唔多，但间中我都有畀家用，父母好明白，慢慢先再孝敬佢哋。”
十多年努力磨剑过程绝对不容易，古淖文认自己的事业欠缺运气，“坦白讲，如果十几年前《星光》得到冠军，我一定嚣到阿妈都唔认得，可能上天觉得我到而家呢个年纪真係ready就畀我。得到冠军係开心，但同时我学识谦卑，决赛第二日返工，大家都恭喜我，但我都係答：‘琴日係冠军，今日係你同事，多多指教！’冠军只係新一章开始，未来路更加长，唔想辜负呢八个月嘅努力。希望将来有自己嘅歌同演唱会，发展随遇而安，个人冇太多顾虑就会开心啲！”
