胡定欣重返Gym Room被笑条腰唔够Fit：好嬲
艺人胡定欣（Nancy）身型一向Fit到漏，皆因佢经常跑步同做Gym保持健康，早排健身室因应政府防疫措施而要关闭，直到近日疫情放缓，健身室亦终于可以重开，Nancy就急不及待即刻飞去操番吓，佢仲喺社交网甫咗两张喺健身室嘅自拍相，睇得出佢系几咁兴奋，不过佢就留言：“有人话我条腰……我好嬲！就系唔够Fit先得嚟操Fit呀嘛，系咪先？！”
虽然佢冇提到对方话佢条腰系肥咗、粗咗定冇咗，但佢咁嬲嬲猪出甫，相信应该都唔系好评喇，不过Nancy都补充话：“终于可以做Gym，冇事，磅数竟然轻咗，操多两嘢就番嚟啦。”佢仲话夏天就到，买件新泳衣畀自己做目标添，心态够晒正面。
网友都留言鼓励返佢：“嗰个人唔识欣赏先至咁讲你嘅啫，唔使理佢”、“一直都keep得好好”，而好友张宝儿就整几个哈哈笑表情留言：“佢应该系话你多腹肌”，Nancy都礼尚往来话：“根本冇覆机。”
