星岛网：庄思敏撑绯闻男友汪小菲斥大S无理
“鱼旦妈”真身夜总会常客曾叫泰韩“鸭仔”
TVB热播剧《一舞倾城》成为热话，剧中重现香港80年代的夜总会面貌，饰演妈妈生“鱼旦妈”的庄思敏(Jacquelin)自爆多年来不时跟朋友去夜总会消遣，甚至帮衬过“鸭店”，发现“鸭仔”唔及男艺人靓仔，冇下次。另外，对于传绯闻的汪小菲将子女正面照曝光被前妻大S提告，Jacquelin唔怕再惹是非撑朋友：“点解唔摆得相？自己仔女喎…唔合理。”
採访：方骞平 形象：Seetz Chan
《一舞倾城》涉及X暴力、S/M、打斗、掌掴等激烈场面，“鱼旦妈”跟李嘉亦有多场牀战，不过由于意识及动作太大胆，观众已无缘睇到，Jacquelin对于心血被Cut唔觉可惜，最重要交代到件事。
对于被批胀爆，她解释因为髮型影响，加上晚装多摺位，连牀上包住的毛巾都好大条：“不过都可以接受嘅，因为我饰演係妈妈生唔係舞小姐。”对于性侵剧情，她认为从过去到现在都一直存在，就算被后父强姦亦有唔少真实案例，剧情只是交代舞小姐职业背后的故事，唔觉重口味。
新型夜总会似K场
Jacquelin当年拍电影《金鸡》时经已落过盛极一时的尖东大富豪夜总会，印象中佈置金碧辉煌，有大厅及贵宾厢房，置身大厅嘅囡囡同客人，你有你揽我有我揽，纸醉金迷，跟剧中呈现的场景差唔多：“即使𠵱家我都会跟朋友去港、台啲新型夜总会，但今时今日嘅夜总会变咗K场，环境唔同晒，不过，依然有妈妈生带女入房畀客人拣，班囡囡着Cocktail Dress，唔似当年着低胸晚装，都係陪客倾偈、唱歌、猜枚、饮酒、出街。”
欢场唔会投入感情
不单去过夜总会消遣，Jacquelin仲自爆10几年前落过尖东“鸭店”叫“鸭仔”，但坦言玩得唔过瘾：“嗰次7个朋友，叫咗4个来自韩国及泰国，好高头大马嘅书生型囝囝，部份来港读书，做PT赚吓外快，其实我冇深入了解佢哋背后嘅故事，更加唔想听，又唔係去助养儿童，去玩只係寻开心，讲真对方未必想讲，讲嘅未必係真，纯粹係无聊跟朋友去见识，一定唔会投放感情落去。”
当晚Jacquelin同囝囝所做嘅事，跟喺夜总会搵囡囡陪坐冇分别：“现实版唔会係电影《鸭王》嘅情节，不论囝囝定囡囡唔算热情进取，跟80年代态度差好远，𠵱家班囡囡仲Sell Cool。我喺呢行见咁多靓仔，佢哋点靓都及唔上，所以都唔好玩嘅，一次性算喇唔好嘥钱。”
冇谂过同小菲发展
另外， 回复单身的庄思敏上月被揭与汪小菲在港密会，对于母亲节时汪小菲为孺仔汪希箖举行生日会，并上载子女正面合照到社交网，令大S（徐熙媛）震怒提告，对此，Jacquelin不平则鸣斥小菲前妻大S野蛮唔合理：“有睇呢单新闻，我觉得惨，仔女係自己嘅，点解唔摆得相？有啲唔合理喎。不过，人哋家事冇得讨论，等佢自己解决，我冇联络佢费事再刺激佢，呢啲时间唔好骚扰佢。”
虽然Jacquelin持开放态度迎接第二春，只要处理得到家事，亦唔介意对象失婚有子女，但强调同汪小菲唔熟，只係随朋友同枱食过一次饭，亦冇谂过发展。
