星岛：张玉珊认爱卢启贤 为男友被指夸大身家喊冤 大讚孝顺係好爸爸
张玉珊自幕前引退从商后，身边一直不乏追求者，但事业大过天的她多年来感情生活一直空白。最近有线人向本报爆料指在意大利甄子丹与汪诗诗举行结婚20週年婚礼的现场，目睹张玉珊与一型男过从甚密，两人糖黐豆般形影不离，更有拖手搂腰等亲密举动。而记者进一步查证后，发现男方为一家人寿保险公司的行政总裁卢启贤，但最近却被某媒体指控其夸大身家。
就此本报特意致电张玉珊求证，她首先大方认爱。“係呀，我哋係喺疫情期间经一位朋友介绍认识嘅。可能我哋大家都係做生意嘅，所以都好多共同话题，而且三观都好吻合。佢最吸引我係份人好孝顺，对佢个囡囡又好好，係一个廿四孝爸爸，而且对自己嘅事业好专注好有要求。最重要係佢好gentleman好识照顾我。我哋而家感情都好好，多谢大家关心。”
记者继而问到最近有关男方的负面报导，张玉珊表示：“其实我觉得呢单根本就係公关灾难啦，佢外国公司同事当佢係Marketing material，英国公关公司当佢提款机，做一次揿一次钱。佢梗係对嗰个记者唔够nice，隻眼擘得唔够大，人哋觉得佢唔够友善，如果唔係点会咁多人唔写去写佢，呢个年代一支笔就可以写死佢。不过食得咸鱼抵得渴，佢做高端财富管理，点样都要保护自己嘅客户，咁佢自己啃咗佢啦！对我嚟讲你哋写佢100亿同10几亿身家，最好个数目讲得越少越好啦！有都最好唔好认，你哋20年嚟问我身家，我从来都无答过啦！”
张玉珊其后补充：“其实我都认识写佢嗰位传媒老闆，事后我都有找佢晦气，我叫佢一係介绍另一个男朋友比我，一係话我知点解咁多人唔写要写佢。佢话你男朋友对啲传媒唔够nice，加上英国公关公司做得太差，我都管唔到我啲同事！Sorry！”
最后，被问到为何不主动向外公开恋情，张玉珊表示：“我不嬲都唔讲呢啲嘢嘅啦，只係希望唔好烧到其他无辜嘅女仔。作为女朋友，我本来都想灰姑娘着玻璃鞋出场，而家变咗花木兰出场都OK吖，哈哈！”
